مسند احمد 15861

اردو ترجمہ

حضرت معن بن یزید سلمی کی حدیثیں۔

حضرت معن سے مروی ہے کہ ایک مرتبہ نبی (صلی اللہ علیہ وآلہ وسلم) نے ارشاد فرمایا مسجد میں سب لوگ جمع ہوجاؤ اور جب لوگ جمع ہوجائیں تو مجھے اطلاع کرنا چنانچہ سب سے پہلے ہم لوگ آئے تھوڑی دیر بعد نبی (صلی اللہ علیہ وآلہ وسلم) باوقار طریقے سے چلتے ہوئے تشریف لائے اور آ کر رونق افروز ہوگئے اسی اثناء میں ہم میں سے ایک آدمی تک بندی کے ساتھ کلام کرتے ہوئے کہنے لگا نبی (صلی اللہ علیہ وآلہ وسلم) غصے میں آ کر کھڑے ہوگئے۔ ہم ایک دوسرے کو ملامت کرنے لگے کہ اللہ نے ہمیں سب سے پہلے حاضر ہونے کی خصوصیت عطا فرمائی تھی اور فلاں شخص نے یہ حرکت کردی پھر ہم نبی (صلی اللہ علیہ وآلہ وسلم) کی خدمت میں حاضر ہوئے تو آپ کو بنو فلاں کی مسجد میں پایا ہم نے نبی (صلی اللہ علیہ وآلہ وسلم) کو راضی کرنے کے لیے کوشش کی تو نبی (صلی اللہ علیہ وآلہ وسلم) ہمارے ساتھ چلتے ہوئے آئے اور پہلے والی نشست پر آکربیٹھ گئے اور فرمایا کہ تمام تعریفیں اللہ کے لیے ہیں وہ جسے چاہتا ہے اپنے سامنے کرلیتا ہے اور جسے چاہتا ہے پیچھے کردیتا ہے اور بعض بیان جادو کا سا اثر رکھتے ہیں پھر نبی (صلی اللہ علیہ وآلہ وسلم) نے ہماری طرف متوجہ ہو کر ہمیں کچھ احکامات بتائے اور کچھ باتیں تعلیم فرمائیں۔

عربی متن کے ذریعے خودکار طور پر اس حدیث سے ملایا گیا — دونوں میں متن ایک ہے۔