مسند احمد 5678

اردو ترجمہ

حضرت عبداللہ بن عمر (رض) کی مرویات

حضرت ابن عمر (رض) سے مروی ہے کہ ایک مرتبہ نبی کریم (صلی اللہ علیہ وآلہ وسلم) نے لوگوں میں " الصلوۃ جامعۃ " کی منادی کروائی، حضرت ابن عمر (رض) کو پتہ چلا تو وہ سب اپنے گھوڑے پر سوار ہو کر اپنے گھر پہنچے، جو کپڑے پہن رکھے تھے وہ اتارے کیونکہ وہ ان کپڑوں میں نبی کریم (صلی اللہ علیہ وآلہ وسلم) کے پاس نہ جاتے تھے اور دوسرے کپڑے بدل کر مسجد کی طرف چل پڑے اس وقت نبی کریم (صلی اللہ علیہ وآلہ وسلم) منبر سے نیچے اتر رہے تھے اور لوگ نبی کریم (صلی اللہ علیہ وآلہ وسلم) کے سامنے کھڑے تھے ابن عمر (رض) نے لوگوں سے پوچھا کہ آج نبی کریم (صلی اللہ علیہ وآلہ وسلم) نے کوئی نیا حکم دیا ہے ؟ لوگوں نے بتایا کہ نبی کریم (صلی اللہ علیہ وآلہ وسلم) نے نبیذ کی ممانعت کردی ہے، انھوں نے پوچھا کون سی نبیذ ؟ لوگوں نے بتایا کدو اور لکڑی میں تیار کی جانے والی۔ راوی کہتے ہیں کہ میں نے نافع (رح) سے پوچھا " جرہ " کا کیا حکم ہے ؟ انھوں نے " جرہ " کیا چیز ہوتی ہے ؟ میں نے کہا حنتمہ، انھوں نے پوچھا " حنتمہ " کیا چیز ہوتی ہے ؟ میں نے کہا مٹکا انھوں نے فرمایا اس کی ممانعت نہیں فرمائی میں نے پوچھا " مزفت " کا کیا حکم ہے ؟ انھوں نے پوچھا " مزفت " کیا چیز ہوتی ہے ؟ میں نے بتایا کہ ایک مشکیزہ ہوتا ہے جس پر لک مل دی جاتی ہے انھوں نے فرمایا : اس دن نبی کریم (صلی اللہ علیہ وآلہ وسلم) نے صرف کدو اور لکڑی کے برتن سے منع فرمایا تھا۔

عربی متن کے ذریعے خودکار طور پر اس حدیث سے ملایا گیا — دونوں میں متن ایک ہے۔