مسند احمد 16577

اردو ترجمہ

حضرت ربیعہ بن کعب اسلمی (رض) کی حدیثیں

حضرت ربیعہ اسلمی (رض) سے مروی ہے کہ میں نبی (صلی اللہ علیہ وآلہ وسلم) کی خدمت کیا کرتا تھا ایک دن نبی (صلی اللہ علیہ وآلہ وسلم) نے مجھ سے فرمایا ربیعہ ! تم شادی کیوں نہیں کرلیتے ؟ میں نے عرض کیا یا رسول اللہ ! واللہ میں تو شادی نہیں کرنا چاہتا کیونکہ ایک تو میرے پاس اتنا نہیں ہے کہ عورت کی ضروریات پوری ہوسکیں اور دوسری بات یہ بھی ہے کہ مجھے یہ بات پسند نہیں ہے کہ کوئی چیز مجھے آپ سے دور کردے، نبی (صلی اللہ علیہ وآلہ وسلم) نے یہ سن کر مجھ سے اعراض فرما لیا اور میں آپ کی خدمت کرتا رہا۔ کچھ عرصہ بعد نبی (صلی اللہ علیہ وآلہ وسلم) نے دوبارہ مجھ سے یہی فرمایا کہ ربیعہ ! تم شادی کیوں نہیں کرلیتے ؟ میں نے حسب سابق وہی جواب دے دیا لیکن پھر میں اپنے دل میں سوچنے لگا کہ مجھ سے زیادہ نبی (صلی اللہ علیہ وآلہ وسلم) جانتے ہیں کہ دنیا و آخرت میں میرے لیے کیا چیز بہتر ہے، اس لیے اب اگر نبی (صلی اللہ علیہ وآلہ وسلم) نے دوبارہ فرمایا تو میں کہہ دوں گا ٹھیک ہے یا رسول اللہ ! آپ مجھے جو چاہیں حکم دیں۔ چنانچہ جب تیسری مرتبہ نبی (صلی اللہ علیہ وآلہ وسلم) نے مجھ سے فرمایا کہ ربیعہ تم شادی کیوں نہیں کرلیتے ؟ تو میں نے عرض کیا کیوں نہیں ! آپ مجھے جو چاہیں حکم دیجئے، نبی (صلی اللہ علیہ وآلہ وسلم) نے انصار کے ایک قبیلے کا نام لے کر جن کے ساتھ نبی (صلی اللہ علیہ وآلہ وسلم) کا تعلق تھا، فرمایا ان کے پاس چلے جاؤ اور جا کر کہو کہ نبی (صلی اللہ علیہ وآلہ وسلم) نے مجھے آپ لوگوں کے پاس بھیجا ہے اور یہ حکم دیا ہے کہ آپ لوگ فلاں عورت کے ساتھ میرا نکاح کردیں۔ چنانچہ میں ان کے پاس چلا گیا اور انھیں نبی (صلی اللہ علیہ وآلہ وسلم) کا یہ پیغام سنا دیا، انھوں نے مجھے خوش آمدید کہا اور کہنے لگے کہ نبی (صلی اللہ علیہ وآلہ وسلم) کا قاصد اپنا کام مکمل کئے بغیر نہیں جائے گا، چنانچہ انھوں نے اس عورت کے ساتھ میرا نکاح کردیا اور میرے ساتھ خوب مہربانی کے ساتھ پیش آئے اور مجھ سے گواہوں کا بھی مطالبہ نہ کیا، وہاں سے لوٹ کر میں نبی (صلی اللہ علیہ وآلہ وسلم) کی خدمت میں غم گین ہو کر حاضر ہوا، نبی (صلی اللہ علیہ وآلہ وسلم) نے پوچھا ربیعہ ! تمہیں کیا ہوا ؟ میں نے عرض کیا یا رسول اللہ ! میں ایک شریف قوم کے پاس پہنچا، انھوں نے میرا نکاح کرادیا میرا اکرام کیا اور مہربانی سے پیش آئے اور مجھ سے گواہوں کا بھی مطالبہ نہیں کیا (ایسے شریف لوگوں کی عورت کو دینے کے لئے) میرے پاس مہر بھی نہیں ہے، نبی (صلی اللہ علیہ وآلہ وسلم) نے حضرت بریدہ سے فرمایا اے بریدہ اسلمی ! اس کے لیے کھجور کی گٹھلی کے برابر سونا جمع کرو، انھوں نے اسے جمع کیا اور میں وہ لے کر نبی (صلی اللہ علیہ وآلہ وسلم) کی خدمت میں حاضر ہوا، نبی (صلی اللہ علیہ وآلہ وسلم) نے فرمایا یہ سونا ان لوگوں کے پاس لے جاؤ اور ان سے کہو کہ یہ اس لڑکی کا مہر ہے، چنانچہ میں نے ان کے پاس پہنچ کر یہی کہہ دیا کہ یہ اس کا مہر ہے، انھوں نے رضامندی سے اسے قبول کرلیا اور کہنے لگے کہ بہت ہے اور پاکیزہ (حلال) ہے۔ تھوڑی دیر بعد میں پھر نبی (صلی اللہ علیہ وآلہ وسلم) کے پاس غم گین ہو کر واپس آگیا، نبی (صلی اللہ علیہ وآلہ وسلم) نے پوچھا ربیعہ ! اب کیوں غم گین ہو ؟ میں نے عرض کیا یا رسول اللہ ! میں نے ان لوگوں سے زیادہ شریف لوگ کہیں نہیں دیکھے، میں نے انھیں جو دے دیا، وہ اسی پر راضی ہوگئے اور تحسین کرتے ہوئے کہنے لگے کہ بہت ہے اور پاکیزہ (حلال) ہے، ایسے لوگوں کو دعوت ولیمہ کھلانے کے لیے میرے پاس کچھ نہیں ہے تو نبی (صلی اللہ علیہ وآلہ وسلم) نے پھر حضرت بریدہ سے فرمایا کہ اس کے لیے ایک بکری لاؤ، چنانچہ وہ ایک نہایت صحت مند اور بہت بڑا مینڈھا لے کر آئے، پھر نبی (صلی اللہ علیہ وآلہ وسلم) نے مجھ سے فرمایا کہ عائشہ کے پاس جاؤ اور ان سے کہو کہ وہ تھیلی دے دیں جس میں غلہ رکھا ہوا ہے، چنانچہ میں نے ان کے پاس جا کر نبی (صلی اللہ علیہ وآلہ وسلم) کا پیغام پہنچا دیا، انھوں نے فرمایا کہ یہ تھیلی ہے، اس میں نو صاع جَو ہے اور بخدا ! اس کے علاوہ ہمارے پاس کچھ نہیں ہے، یہی لے جاؤ، چنانچہ میں وہ تھیلی لے کر نبی (صلی اللہ علیہ وآلہ وسلم) کے پاس آیا اور حضرت عائشہ کا پیغام پہنچا دیا۔ نبی (صلی اللہ علیہ وآلہ وسلم) نے فرمایا یہ دونوں چیزیں ان لوگوں کے پاس لے جاؤ اور ان سے کہو کہ اس کی روٹیاں بنالیں، چنانچہ میں ان کے پاس چلا گیا اور وہ مینڈھا بھی ساتھ لے گیا، میرے ساتھ قبیلہ اسلم کے کچھ لوگ تھے وہاں پہنچ کر ان لوگوں سے کہا کہ اس آٹے کی روٹیاں پکالیں اور اس مینڈھے کا گوشت پکا لیں، وہ کہنے لگے کہ روٹیوں کے معاملے میں ہم آپ کی کفایت کریں گے اور مینڈھے کے معاملے میں آپ ہماری کفایت کرو، چنانچہ میں نے اور میرے ساتھیوں نے مل کر مینڈھے کو پکڑا، اسے ذبح کیا، اس کی کھال اتاری اور اسے پکانے لگے، اس طرح روٹی اور گوشت تیار ہوگیا اور میں نے اپنا ولیمہ کردیا اور اس میں نبی (صلی اللہ علیہ وآلہ وسلم) کو بھی دعوت دی۔ کچھ عرصے کے بعد نبی (صلی اللہ علیہ وآلہ وسلم) نے مجھے زمین کا ایک ٹکڑا مرحمت فرمادیا اور اس کے ساتھ ہی حضرت صدیق اکبر کو بھی ایک ٹکڑا دے دیا، جب دنیا آئی تو ایک مرتبہ ہم دونوں کے درمیان کھجور کے ایک درخت کے متعلق اختلاف رائے ہوگیا میں کہتا تھا کہ یہ درخت میری حدود میں ہے اور حضرت صدیق اکبر کا کہنا تھا کہ یہ میری حدود میں ہے میرے اور ان کے درمیان اس بات پر تکرار ہونے لگی تو حضرت ابوبکر نے مجھے ایک ایسا لفظ کہہ دیا جس پر بعد میں وہ خود پشیمان ہونے لگے اور فرمانے لگے ربیعہ ! تم بھی مجھے اسی طرح کا لفظ کہہ دو تاکہ معاملہ برابر ہوجائے، میں نے کہا کہ میں تو ایسا نہیں کروں گا، حضرت صدیق اکبر نے فرمایا یا تم یہ لفظ کہہ دو ، ورنہ میں نبی (صلی اللہ علیہ وآلہ وسلم) کے سامنے تمہارے خلاف استغاثہ کروں گا، میں نے پھر کہا کہ میں تو ایسا نہیں کروں گا۔ اس پر حضرت صدیق اکبر زمین چھوڑ کر نبی (صلی اللہ علیہ وآلہ وسلم) کی خدمت میں روانہ ہوگئے، میں بھی ان کے پیچھے روانہ ہونے لگا تو قبیلہ اسلم کے کچھ لوگ میرے پاس آئے اور مجھ سے کہنے لگے کہ اللہ تعالیٰ ابوبکر پر رحم فرمائے، وہ کس بناء پر تمہارے خلاف نبی (صلی اللہ علیہ وآلہ وسلم) کے سامنے استغاثہ کر رہے ہیں جبکہ خود ہی انھوں نے ایسی بات کہی ہے ؟ میں نے انھیں جواب دیا کہ تم جانتے ہو یہ کون ہیں ؟ یہ ابوبکر صدیق ہیں، یہ ثانی اثنین ہیں، یہ ذو شیبۃ المسلمین ہیں، تم لوگ واپس چلے جاؤ، کہیں ایسا نہ ہو کہ وہ تمہیں دیکھ لیں کہ تم میری مدد کے لیے آئے ہو اور وہ غضب ناک ہو کر نبی (صلی اللہ علیہ وآلہ وسلم) کے پاس پہنچیں، انھیں غصے میں دیکھ کر نبی (صلی اللہ علیہ وآلہ وسلم) کو غصہ آجائے گا اور ان کے غصے کی وجہ سے اللہ کو غصہ آجائے گا اور ربیعہ ہلاک ہوجائے گا، انھوں نے پوچھا کہ پھر آپ ہمیں کیا حکم دیتے ہیں ؟ میں نے کہا کہ تم لوگ واپس چلے جاؤ، پھر میں اکیلا ہی حضرت صدیق اکبر کے پیچھے روانہ ہوگیا، حضرت صدیق اکبر نے بارگاہ نبوت میں حاضر ہو کر سارا واقعہ بعینہ بتادیا، نبی (صلی اللہ علیہ وآلہ وسلم) نے سر اٹھا کر میری طرف دیکھا اور فرمایا ربیعہ ! صدیق کے ساتھ تمہارا کیا جھگڑا ہے ؟ میں عرض کیا یا رسول اللہ ! ایسی ایسی بات ہوئی تھی اور انھوں نے ایک ایسا لفظ کہہ دیا تھا جس پر بعد میں خود انھیں ناپسندیدگی ہوئی اور انھوں نے مجھ سے کہا کہ تم بھی میری طرح یہ جملہ مجھے کہہ دو تاکہ معاملہ برابر ہوجائے، لیکن میں نے انکار کردیا، نبی (صلی اللہ علیہ وآلہ وسلم) نے فرمایا ٹھیک ہے، تم وہی جملہ نہ دہراؤ، یہ کہہ دو کہ اے ابوبکر ! اللہ آپ کو معاف فرمائے، چنانچہ میں نے یہی الفاظ کہہ دیئے اور حضرت صدیق اکبر روتے ہوئے واپس چلے گئے۔

عربی متن کے ذریعے خودکار طور پر اس حدیث سے ملایا گیا (98٪ الفاظ یکساں)۔ جس نسخے سے ترجمہ کیا گیا اس کے الفاظ میں معمولی فرق ہے — ترجمہ اسی عربی متن کا ہے۔