مسند احمد 15281

اردو ترجمہ

حضرت جابر انصاری کی مرویات۔

حضرت جابر (رض) سے مروی ہے کہ نبی (صلی اللہ علیہ وآلہ وسلم) مشرکین سے قتال کے لیے مدینہ منورہ سے نکلے مجھ سے میرے والد صاحب عبداللہ نے کہہ دیا تھا کہ جابر (رض) تم اس وقت تک نہ نکلنا جب تک تمہیں یہ معلوم نہ ہوجائے کہ ہمارا انجام کیا ہوا واللہ اگر میں نے اپنے پیچھے بیٹیاں نہ چھوڑی ہوتیں تو میری خواہش ہوتی کہ تمہیں میرے سامنے شہادت نصیب ہو چنانچہ میں اپنے باغ میں ہی رہا کہ اچانک میری پھوپھی میرے والد اور میرے ماموں کو اونٹ پر لاد کرلے آئیں وہ مدینہ منورہ میں داخل ہوئیں تاکہ انھیں ہمارے قبرستان میں دفن کردیں اچانک ایک آدمی منادی کرتا ہوا آیا نبی (صلی اللہ علیہ وآلہ وسلم) تمہیں حکم دیتے ہیں کہ اپنے مقتولین کو واپس لے جا کر اس جگہ دفن کرو جہاں وہ شہید ہوئے تھے چنانچہ ہم ان دونوں کو لے کر واپس لوٹے اور مقام شہادت میں انھیں دفن کردیا۔ حضرت امیر معاویہ کے دور خلافت میں ایک آدمی میرے پاس آیا اور کہنے لگا کہ اے جابر (رض) حضرت معاویہ کے گورنروں نے آپ کے والد کی قبر کھودی ہے اور وہ اپنی قبر میں نظر آرہے ہیں میں وہاں پہنچا تو اسی حال میں پایا جس حال میں میں نے انھیں دفن کیا تھا ان میں کسی قسم کی کوئی تبدیلی نہیں ہوئی تھی سوائے اس معمولی چیز کے جو قتل کی وجہ سے ہو ہی جاتی ہے پھر میں نے ان کی مکمل تدفین کی۔ میرے والد صاحب نے اپنے اوپر کھجوروں کا کچھ قرض بھی چھوڑا تھا قرض خواہوں نے اس کا تقاضا مجھ سے سختی سے کرنا شروع کردیا مجبو رہو کر میں نبی (صلی اللہ علیہ وآلہ وسلم) کی خدمت میں آیا اور عرض کیا اے اللہ کے نبی (صلی اللہ علیہ وآلہ وسلم) میرے والد صاحب فلاں موقع پر شہید ہوگئے اور مجھ پر کھجور کا قرض چھوڑ گئے قرض خواہوں نے اس کا تقاضا مجھ سے سختی کے ساتھ کرنا شروع کردیا میں چاہتا ہوں کہ آپ میرے ساتھ کچھ تعاون کریں کہ وہ مجھے ایک سال کی مہلت دیں نبی (صلی اللہ علیہ وآلہ وسلم) نے فرمایا اچھا میں تمہارے پاس نصف النہار کے وقت انشاء اللہ آؤں گا چنانچہ نبی (صلی اللہ علیہ وآلہ وسلم) چند صحابہ کے ساتھ آگئے اور اجازت لے کر گھر میں داخل ہوئے میں نے اپنی بیوی سے پہلے ہی کہہ دیا تھا کہ نصف النہار کے وقت نبی (صلی اللہ علیہ وآلہ وسلم) آئیں گے لیکن تم مجھے نظر نہ آنا نبی (صلی اللہ علیہ وآلہ وسلم) کو کوئی تکلیف پہنچانا اور نہ ہی ان سے کوئی فرمائش کرنا بہرحال اس نے نبی (صلی اللہ علیہ وآلہ وسلم) کے لیے بستر بچھا دیا اور تکیہ رکھا جس پر سر رکھ کر نبی (صلی اللہ علیہ وآلہ وسلم) سو گئے۔ میں نے اپنے ایک غلام سے کہا کہ جلدی سے یہ بکری ذبح کرو اور نبی (صلی اللہ علیہ وآلہ وسلم) کے بیدار ہونے سے پہلے اس سے فارغ ہوجاؤ میں بھی تمہارا ساتھ دیتا ہوں چنانچہ نبی (صلی اللہ علیہ وآلہ وسلم) کے بیدار ہونے سے پہلے ہی ہم اس سے فارغ ہوگئے میں نے اس سے کہا کہ نبی (صلی اللہ علیہ وآلہ وسلم) جب بیدار ہوں تو وضو کے لیے پانی منگوائیں گے جب وہ وضو سے فارغ ہوں تو فورا ہی ان کے سامنے کھانا پیش کردیا جائے چنانچہ ایسا ہی ہوا کہ نیند سے بیدار ہو کر نبی (صلی اللہ علیہ وآلہ وسلم) نے پانی منگوایا اور ابھی وضو فرما کر فارغ بھی نہ ہونے پائے تھے کہ کھانا سامنے رکھ دیا گیا نبی (صلی اللہ علیہ وآلہ وسلم) نے مجھے دیکھ کر فرمایا شاید تمہیں بھی گوشت کی طرف ہماری رغبت کا اندازہ ہوگیا ہے ابوبکر کو بلاؤ پھر نبی (صلی اللہ علیہ وآلہ وسلم) نے اپنے ساتھ آنے والے دیگر صحابہ کو بھی بلا لیا وہ آگئے نبی (صلی اللہ علیہ وآلہ وسلم) نے کھانے میں ہاتھ ڈال دیا اور فرمایا بسم اللہ کھاؤ ان سب نے خوب سیراب ہو کر کھایا پھر بھی بہت سا گوشت بچ گیا واللہ بنوسلمہ کے لوگ بیٹھے ہوئے نبی (صلی اللہ علیہ وآلہ وسلم) کو دیکھ رہے تھے یہ منظر ان کے لیے بڑا محبوب تھا لیکن وہ صرف اس بناء پر قریب نہ آتے تھے کہ نبی (صلی اللہ علیہ وآلہ وسلم) کو کوئی ایذاء نہ پہنچ جائے۔ جب وہ لوگ کھانے سے فارغ ہوئے تو نبی (صلی اللہ علیہ وآلہ وسلم) اور آپ کے صحابہ کھڑے ہوگئے صحابہ آگے آگے چل رہے تھے اور نبی (صلی اللہ علیہ وآلہ وسلم) فرما رہے تھے کہ میری پشت کو فرشتوں کے لیے چھوڑ دو میں بھی ان کے پیچھے چل پڑا جب وہ دروازے کے قریب پہنچے تو میری بیوی نے ایک ستون کی آڑ سے کہا یا رسول اللہ میرے لیے اور میرے شوہر کے لیے دعا کردیجیے اللہ آپ پر درود بھیجے نبی (صلی اللہ علیہ وآلہ وسلم) نے فرمایا اللہ تم اور تمہارے شوہر پر اپنی رحمتیں نازل کرے پھر میرے قرض خواہ کا نام لے کر فرمایا اسے بلا کر لاؤ یہ وہی شخص تھا جو بڑی سختی سے قرض کا مطالبہ کررہا تھا وہ آیا نبی (صلی اللہ علیہ وآلہ وسلم) نے اس سے فرمایا جابر (رض) پر اگلے سال تک کے لیے تھوڑی دیر آسانی کردو اس نے کہا میں تو ایسا نہیں کروں گا وہ مزید بدک گیا اور کہنے لگا کہ یہ تو یتمیوں کا مال ہے نبی (صلی اللہ علیہ وآلہ وسلم) نے فرمایا جابر (رض) کہاں ہے میں نے عرض کیا یا رسول اللہ میں یہاں ہوں نبی (صلی اللہ علیہ وآلہ وسلم) نے فرمایا ناپ کردینا شروع کردو اللہ پورا کردے گا میں نے آسمان کی طرف نگاہ ڈالی تو سورج ڈھل چکا تھا میں نے عرض کیا اے ابوبکر نماز کا وقت ہوگیا ہے چنانچہ وہ لوگ مسجد میں چلے گئے اور میں نے قرض خواہ سے کہا کہ اپنا برتن لاؤ اور میں نے اس کو ناپ کر عجوہ کھجور دیدی اللہ نے اسے پورا کردیا اور اتنی مقدار بچ گئی میں ڈورتا ہوا نبی (صلی اللہ علیہ وآلہ وسلم) کی خدمت میں حاضر ہوا اس وقت تک نبی (صلی اللہ علیہ وآلہ وسلم) نماز پڑھ چکے تھے میں نے عرض کیا یا رسول اللہ دیکھیے تو سہی کہ میں نے اپنے قرض خواہ کو کھجور ناپ کردی تو اللہ نے اسے پورا کردیا اور اتنی مقدار بچ بھی گئی نبی (صلی اللہ علیہ وآلہ وسلم) نے فرمایا عمر بن خطاب کہاں ہیں وہ دوڑتے ہوئے آئے نبی (صلی اللہ علیہ وآلہ وسلم) نے ان سے فرمایا کہ جابر (رض) سے اس کے قرض خواہ اور کھجوروں کے متعلق پوچھو انھوں نے عرض کیا میں نہیں پوچھوں گا اس لیے کہ جب آپ نے یہ فرما دیا کہ اللہ پورا کر دے گا تو مجھے یقین ہوگیا تھا کہ اللہ پورا کر دے گا تین مرتبہ اسی طرح تکرار ہوا تیسری مرتبہ انھوں نے نبی (صلی اللہ علیہ وآلہ وسلم) کی بات کو رد کرنا مناسب نہیں سمجھا اور پوچھ لیا کہ جابر (رض) تمہارے قرض خواہ اور کھجور کا کیا معاملہ بنا۔ میں نے انھیں بتایا کہ اللہ نے پورا کردیا بلکہ اتنی کھجوریں بچ بھی گئی پھر میں نے گھر آکر اپنی بیوی سے کہا میں نے تمہیں منع نہ کیا تھا کہ نبی (صلی اللہ علیہ وآلہ وسلم) سے کوئی بات نہ کرنا اس نے کہا کیا آپ یہ سمجھتے ہیں کہ اللہ نبی (صلی اللہ علیہ وآلہ وسلم) کو میرے گھر لے کر آئے اور وہ جانے لگیں تو میں ان سے اپنے لیے اور اپنے شوہر کے لیے دعا کی درخواست بھی نہ کروں گی ؟۔

عربی متن کے ذریعے خودکار طور پر اس حدیث سے ملایا گیا (99٪ الفاظ یکساں)۔ جس نسخے سے ترجمہ کیا گیا اس کے الفاظ میں معمولی فرق ہے — ترجمہ اسی عربی متن کا ہے۔