مسند احمد 12471

اردو ترجمہ

حضرت انس بن مالک (رض) کی مرویات

حضرت انس (رض) سے مروی ہے کہ نبی (صلی اللہ علیہ وآلہ وسلم) نے بیس سے کچھ زائد سرداران قریش کے متعلق حکم فرمایا کہ انھیں کھینچ کر بدر کے ایک کنویں میں ان کی تمام تر خباثتوں کے ساتھ پھینک دیا جائے، چنانچہ ایسا ہی ہوا، نبی (صلی اللہ علیہ وآلہ وسلم) کا معمول تھا کہ کسی قوم پر فتح حاصل ہونے کے بعد وہاں تین راتیں رکتے تھے، اہل بدر پر فتح پانے کے بعد نبی (صلی اللہ علیہ وآلہ وسلم) وہاں بھی تین راتیں رکے رہے، تیسرے دن آپ (صلی اللہ علیہ وآلہ وسلم) نے سواری تیار کرنے کا حکم دیا، سواری تیار ہوگئی تو نبی (صلی اللہ علیہ وآلہ وسلم) ایک طرف کو چل پڑے، صحابہ (رض) آپ (صلی اللہ علیہ وآلہ وسلم) کے پیچھے تھے، ہمارا خیال تھا کہ نبی (صلی اللہ علیہ وآلہ وسلم) قضاء حاجت کے لیے جا رہے ہیں، لیکن نبی (صلی اللہ علیہ وآلہ وسلم) اس کنویں کے دہانے پر پہنچ کر رک گئے اور انھیں ان کے اور ان کے باپوں کے نام سے پکار پکار کر آوازیں دینے لگے اور فرمانے لگے کہ کیا اب تمہیں یہ بات اچھی لگ رہی ہے کہ کاش ! تم نے اللہ اور اس کے رسول کی اطاعت کی ہوتی ؟ کیا تم سے تمہارے رب نے جو وعدہ کیا تھا تم نے اسے سچ پایا ؟ حضرت عمر (رض) نے عرض کیا اے اللہ کے نبی (صلی اللہ علیہ وآلہ وسلم) ! آپ ایسے جسموں سے بات کر رہے ہیں جن میں روح نہیں ہے، نبی (صلی اللہ علیہ وآلہ وسلم) نے فرمایا اس ذات کی قسم جس کے دست قدرت میں محمد (صلی اللہ علیہ وآلہ وسلم) کی جان ہے، میں ان سے جو کہہ رہا ہوں تم ان سے زیادہ نہیں سن رہے۔ قتادہ (رح) کہتے ہیں کہ اللہ نے انھیں نبی (صلی اللہ علیہ وآلہ وسلم) بات سننے کے لیے دوبارہ زندگی عطاء فرمائی تھی اور اس کا مقصد زجر و توبیخ، ان کی تحقیر اور سزا تھی۔

عربی متن کے ذریعے خودکار طور پر اس حدیث سے ملایا گیا — دونوں میں متن ایک ہے۔