مسند احمد 707

اردو ترجمہ

حضرت علی (رض) کی مرویات

حضرت عبداللہ بن زبیر (رض) کہتے ہیں کہ بخدا ! ہم اس وقت حضرت عثمان غنی (رض) کے ساتھ مقام جحفہ میں تھے جب کہ ان کے پاس اہل شام کا ایک وفد آیا تھا ان میں حبیب بن مسلمہ فہری بھی تھے، حضرت عثمان غنی (رض) کے سامنے حج تمتع کا ذکر چھڑا تو انھوں نے فرمایا حج اور عمرہ کا اتمام یہ ہے کہ ان دونوں کو اشہر حج میں اکٹھا نہ کیا جائے اگر تم اپنے عمرہ کو موخر کردو اور بیت اللہ کی دو مرتبہ زیارت کرو تو یہ زیادہ افضل ہے، کیونکہ اللہ تعالیٰ نے نیکی کے کاموں میں وسعت اور کشادگی رکھی ہے۔ اس وقت حضرت علی (رض) بطن وادی میں اپنے اونٹ کو چارہ کھلا رہے تھے، انھیں حضرت عثمان غنی (رض) کی یہ بات معلوم ہوئی تو وہ حضرت عثمان (رض) کی خدمت میں حاضر ہوئے اور کہنے لگے کہ کیا آپ نبی (صلی اللہ علیہ وآلہ وسلم) کی ایک سنت کا اور اللہ کی اس رخصت کو جو اس نے قرآن میں اپنے بندوں کو دی ہے، لوگوں کو اس سے روک کر انھیں تنگی میں مبتلا کریں گے ؟ حالانکہ ضرورت مند آدمی کے لیے اور اس شخص کے لیے جس کا گھر دور ہو، یہ حکم یعنی حج تمتع کا اب بھی باقی ہے۔ یہ کہہ کر حضرت علی (رض) نے حج اور عمرہ دونوں کا احرام باندھ لیا (تاکہ لوگوں پر اس کا جواز واضح ہوجائے) اس پر حضرت عثمان (رض) نے لوگوں کے سامنے آکر ان سے پوچھا کہ کیا میں نے حج تمتع سے منع کیا ہے ؟ میں نے تو اس سے منع نہیں کیا، یہ تو ایک رائے تھی جس کا میں نے مشورہ دیا تھا، جو چاہے قبول کرے اور جو چاہے چھوڑ دے۔

عربی متن کے ذریعے خودکار طور پر اس حدیث سے ملایا گیا — دونوں میں متن ایک ہے۔