مسند احمد 4149

اردو ترجمہ

حضرت عبداللہ بن مسعود (رض) کی مرویات

علقمہ کہتے ہیں کہ ایک مرتبہ میں نے حضرت ابن مسعود (رض) سے پوچھا کہ کیا لیلۃ الجن کے موقع پر آپ میں سے کوئی صاحب نبی (صلی اللہ علیہ وآلہ وسلم) کے ساتھ بھی تھے ؟ انھوں نے جواب دیا کہ نہیں، ہم میں سے ان کے ساتھ کوئی نہیں تھا، بلکہ ایک مرتبہ رات کو ہم نے نبی (صلی اللہ علیہ وآلہ وسلم) کو گم پایا، ہم فکر مند ہوگئے کہ کہیں کوئی شخص نبی (صلی اللہ علیہ وآلہ وسلم) کو دھوکے سے کہیں لے تو نہیں گیا ؟ اور ہم پریشان تھے کہ یہ کیا ہوگیا ؟ ہم نے وہ ساری رات جو کسی بھی قوم کے لیے انتہائی پریشان کن ہوسکتی ہے، اسی طرح گذاری، جب صبح کا چہرہ دکھائی دیا تو نبی (صلی اللہ علیہ وآلہ وسلم) بھی ہمیں غار حراء کی جانب سے آتے ہوئے نظر آئے، ہم نے نبی (صلی اللہ علیہ وآلہ وسلم) سے اپنی فکرمندی اور پریشانی کا ذکر کیا تو نبی (صلی اللہ علیہ وآلہ وسلم) نے فرمایا کہ میرے پاس جنات میں سے ایک جن دعوت لے کر آیا تھا، میں ان کے پاس چلا گیا اور انھیں قرآن کریم پڑھ کر سنایا، وہ مجھے لے گیا اور اس نے مجھے اپنے آثار اور اپنی آگ کے اثرات دکھائے، (امام شعبی (رح) فرماتے ہیں کہ انھوں نے نبی (صلی اللہ علیہ وآلہ وسلم) سے توشہ کی درخواست کی تھی) وہ جزیرہ عرب کے جنات تھے۔ نبی (صلی اللہ علیہ وآلہ وسلم) نے ان سے فرمایا کہ ہر وہ ہڈی جس پر اللہ کا نام لیا گیا ہو اور وہ تمہارے ہاتھوں میں آجائے، اس پر جنات کے لیے پہلے سے زیادہ گوشت آجاتا ہے اور ہر وہ مینگنی یا لید جو تمہارے جانور کریں، ان سے استنجاء نہ کیا کرو کیونکہ یہ تمہارے جن بھائیوں کی خوراک ہے۔

عربی متن کے ذریعے خودکار طور پر اس حدیث سے ملایا گیا (96٪ الفاظ یکساں)۔ جس نسخے سے ترجمہ کیا گیا اس کے الفاظ میں معمولی فرق ہے — ترجمہ اسی عربی متن کا ہے۔