مسند احمد 2707

اردو ترجمہ

عبداللہ بن عباس کی مرویات

ابوالطفیل کہتے ہیں کہ میں نے ایک مرتبہ حضرت ابن عباس (رض) سے عرض کیا کہ آپ کی قوم کا خیال ہے کہ نبی (صلی اللہ علیہ وآلہ وسلم) نے دوران طواف رمل کیا ہے اور یہ سنت ہے ؟ انھوں نے فرمایا کہ یہ لوگ کچھ سچ اور کچھ غلط کہتے ہیں، میں نے عرض کیا سچ کیا ہے اور غلط کیا ہے ؟ فرمایا سچ تو یہ ہے کہ نبی (صلی اللہ علیہ وآلہ وسلم) نے بیت اللہ کا طواف کرتے ہوئے رمل کیا ہے لیکن اسے سنت قرار دینا غلط ہے اس کی وجہ یہ ہے کہ قریش نے صلح حدیبیہ کے موقع پر کہا تھا کہ محمد (صلی اللہ علیہ وآلہ وسلم) اور ان کے صحابہ (رض) کو چھوڑ دو ، تاآنکہ یہ اسی طرح مرجائیں جیسے اونٹ کی ناک میں کیڑا نکلنے سے وہ مرجاتا ہے، جب انھوں نے نبی (صلی اللہ علیہ وآلہ وسلم) سے منجملہ دیگر شرائط کے اس شرط پر صلح کی کہ نبی (صلی اللہ علیہ وآلہ وسلم) اپنے صحابہ (رض) کے ساتھ آئندہ سال مکہ مکرمہ میں آکر تین دن ٹھہر سکتے ہیں تو نبی (صلی اللہ علیہ وآلہ وسلم) آئندہ سال تشریف لائے، مشرکین جبل قعیقعان کی طرف بیٹھے ہوئے تھے، انھیں یہ دیکھ کر نبی (صلی اللہ علیہ وآلہ وسلم) نے صحابہ کو تین چکروں میں رمل کا حکم دیا، یہ سنت نہیں ہے، میں نے عرض کیا کہ آپ کی قوم کا یہ بھی خیال ہے کہ نبی (صلی اللہ علیہ وآلہ وسلم) نے صفا مروہ کے درمیان سعی اونٹ پر بیٹھ کر کی ہے اور یہ سنت ہے ؟ حضرت ابن عباس (رض) نے فرمایا یہ لوگ کچھ صحیح اور کچھ غلط کہتے ہیں، میں نے عرض کیا کہ صحیح کیا ہے اور غلط کیا ہے ؟ فرمایا یہ بات تو صحیح ہے کہ نبی (صلی اللہ علیہ وآلہ وسلم) نے اونٹ پر بیٹھ کر سعی کی ہے، لیکن اسے سنت قرار دینا غلط ہے، اصل میں لوگ نبی (صلی اللہ علیہ وآلہ وسلم) کے پاس سے ہٹتے تھے اور نہ ہی انھیں ہٹایا جاسکتا تھا، اس لیے نبی (صلی اللہ علیہ وآلہ وسلم) نے اونٹ پر بیٹھ کر سعی کی تاکہ وہ نبی (صلی اللہ علیہ وآلہ وسلم) کا کلام بھی سن لیں اور ان کے ہاتھ بھی نبی (صلی اللہ علیہ وآلہ وسلم) تک نہ پہنچیں۔ میں نے عرض کیا کہ آپ کی قوم کا یہ بھی خیال ہے کہ جناب رسول اللہ (صلی اللہ علیہ وآلہ وسلم) نے صفا مروہ کے درمیان سعی کی اور یہ سعی کرنا سنت ہے ؟ فرمایا وہ سچ کہتے ہیں، جب حضرت ابراہیم (علیہ السلام) کو مناسک حج کی ادائیگی کا حکم ہوا تو شیطان مسعی کے قریب ان کے سامنے آیا اور ان سے مسابقت کی، لیکن حضرت ابراہیم (علیہ السلام) آگے بڑھ گئے، پھر حضرت جبرائیل (علیہ السلام) انھیں لے کر جمرہ عقبہ کی طرف روانہ ہوئے تو راستے میں پھر شیطان ان کے سامنے آگیا، حضرت ابراہیم (علیہ السلام) نے اسے سات کنکریاں دے ماریں اور وہ دور ہوگیا، جمرہ وسطی کے قریب وہ دوبارہ ظاہر ہوا تو حضرت ابراہیم (علیہ السلام) نے اسے پھر سات کنکریاں ماریں، یہی وہ جگہ ہے جہاں حضرت ابراہیم (علیہ السلام) نے حضرت اسماعیل (علیہ السلام) کو پیشانی کے بل لٹایا تھا۔ حضرت اسماعیل (علیہ السلام) نے اس وقت سفید رنگ کی قمیص پہن رکھی تھی، وہ کہنے لگے اباجان ! اس کے علاوہ تو میرے کوئی کپڑے نہیں ہیں جن میں آپ مجھے کفن دے سکیں، اس لیے آپ ان ہی کپڑوں کو میرے جسم پر سے اتار لیں تاکہ اس میں مجھ کو کفن دے سکیں، حضرت ابراہیم (علیہ السلام) ان کے کپڑے اتارنے کے لیے آگے بڑھے تو ان کے پیچھے سے کسی نے آواز لگائی اے ابراہیم ! (علیہ السلام) تم نے اپنے خواب کو سچ کر دکھایا، حضرت ابراہیم (علیہ السلام) نے پیچھے مڑ کر دیکھا تو وہاں ایک سفید رنگ کا، سینگوں والا اور بڑی بڑی آنکھوں والا دنبہ کھڑا تھا، حضرت ابن عباس (رض) فرماتے ہیں کہ ہم نے اپنے آپ کو اس ضرب کے نشانات تلاش کرتے ہوئے دیکھا ہے۔ پھر حضرت جبرائیل (علیہ السلام) انھیں لے کر آخری جمرہ کی طرف چلے، راستے میں پھر شیطان سامنے آیا، حضرت ابراہیم (علیہ السلام) نے پھر اسے سات کنکریاں ماریں، یہاں تک کہ وہ دور ہوگیا، پھر حضرت جبرائیل (علیہ السلام) انھیں لے کر منیٰ کے میدان میں آئے اور فرمایا کہ یہ منیٰ ہے، پھر مزدلفہ لے کر آئے اور بتایا کہ یہ مشعر حرام ہے، پھر انھیں لے کر عرفات پہنچے۔ کیا تم جانتے ہو کہ عرفہ کی وجہ تسمیہ کیا ہے ؟ میں نے عرض کیا کہ نہیں۔ فرمایا یہاں پہنچ کر حضرت جبرائیل (علیہ السلام) نے حضرت ابراہیم (علیہ السلام) سے پوچھا کہ کیا آپ پہچان گئے ؟ انھوں نے فرمایا ہاں ! حضرت ابن عباس (رض) فرماتے ہیں کہ یہیں سے اس جگہ کا نام عرفہ پڑگیا، پھر فرمایا کیا تم جانتے ہو کہ تلبیہ کا آغاز کیسے ہوا ؟ میں نے پوچھا کہ کیسے ہوا ؟ فرمایا کہ جب حضرت ابراہیم (علیہ السلام) کو لوگوں میں حج کی منادی کرنے کا حکم ہوا تو پہاڑوں نے ان کے سامنے اپنے سر جھکا دیئے اور بستیاں ان کے سامنے اٹھا کر پیش کردی گئیں اور حضرت ابراہیم (علیہ السلام) نے لوگوں میں حج کا اعلان فرمایا۔ گزشتہ حدیث اس دوسری سند سے بھی مروی ہے۔

عربی متن کے ذریعے خودکار طور پر اس حدیث سے ملایا گیا (94٪ الفاظ یکساں)۔ جس نسخے سے ترجمہ کیا گیا اس کے الفاظ میں معمولی فرق ہے — ترجمہ اسی عربی متن کا ہے۔